Sad ghazal || main nafrat k oaz muhabbat beach aya hun || heart tuching ghazal

میں نفرت کے عوض ساری محبت بیچ آیا ہوں

جو پل بھر کو ملی تھوڑی مُسرت بیچ آیا ہوں

---

مجھے حق ہی نہیں یارو! کوئی ارمان رکھنے کا

سرِ بازار میں ہر ایک حسرت بیچ آیا ہوں

---

ضرورت کو ہی خواہش کر کے ساری عُمر کاٹی تھی

مگر میں آج اپنی ہر ضرورت بیچ آیا ہوں

---

خزائیں ہی خزائیں ہیں فقط، میرے مقدر میں

بہاروں سے جو رکھی تھی وہ رغبت بیچ آیا ہوں

---

کبھی اِک وقت تھا یارو! کہ میں بھی دِل سے ہنستا تھا

مگر اب ہار کر اپنی وہ فطرت بیچ آیا ہوں

---

مجھے معلوم تھا جاناں ملن ہر گز نہیں ہو گا

بہت ہی سینت کر رکھی وہ قربت بیچ آیا ہوں

---

اثر کچھ بھی نہیں ہوتا ،بھلے کچھ بھی کہو مجھ کو

کبھی ماتھے پہ پڑتی تھی وہ سَلوَٹ بیچ آیا ہوں

---

فقط اِک خواب دیکھا تھا صنم، اوقات سے بڑھ کر

صِلہ اُس خواب کا آنکھوں کی صورت بیچ آیا ہوں

---

سکوں تو چھِن گیا کب کا ،مجھے اب چین کیونکر ہو

کہ جس پہ نیند آتی تھی وہ کروٹ بیچ آیا ہوں

---

حسابِ وقت سے میرا تعلق اب نہیں کوئی

میں رسمیں توڑ آیا ہوں، روایت بیچ آیا ہوں

---

ضرورت ہی نہیں مولا ! دُعا مقبول کرنے کی

میں مذہب چھوڑ آیا ہوں، عبادت بیچ آیا ہوں

---

سبھی کچھ بیچ کر پھر گھر کو کیسے لوٹ کر آتا ؟

میں واپس لوٹ کر آنے کی عادت بیچ آیا ہوں

---

سبھی کچھ بِک گیا بس اِک مری تنہائی باقی ہے

بہت انمول ہے یہ ، اِس کی قیمت بیچ آیا ہوں

---

علیؔ بازار والوں نے عجب سودا کیا مجھ سے

وہ نفرت لے کے آئے، میں محبت بیچ آیا ہوں

💔💔💔💔